Pistlar

SENDU OKKUR ÞÍNA SKOÐUN Á ÞESSUM PISTLI

Sigurður Guðmundsson
ÓSKARSVERÐLAUNIN 2002

Óskarsverðlaunin voru veitt í nótt á glæsilegri hátíð í Hollywood. Þetta var langt og það kom fátt á óvart.

Hátíðin byrjaði með ræðu sem Tom Cruise flutti af textaskjá um hryðjuverkin í New York og afleiðingar þeirra. Raunveruleg ástæða þessarar ræðu var að fá fólk til að slappa af og skemmta sér. Það er nefnilega erfitt að vera kvikmyndastjarna og sjá að aðrir mikilvægari hlutir, s.s. barátta fyrir lífi og frelsi, hafi ýtt manni neðar í forgangsröðina.

Svo kom kynnir kvöldsins, Whoopi Goldberg, svífandi úr loftinu í rólu, íklædd svipuðum búningi og Nicole Kidman í Moulin Rouge. Þetta var sniðugt uppátæki hjá henni og kom öllum í gott skap. Svo sagði hún nokkra brandara.

Besta aukaleikkona var Jennifer Connelly. Besti aukaleikarinn síðan í fyrra, Benicio Del Toro, afhenti henni hennar verðlaun og brosti. Jennifer Connelly brosti líka en fór ekki að gráta.

Verðlaun fyrir bestu klippingu féllu í hlut Pietro Scalia fyrir klippingu sína á myndinni Black Hawk Down og er hann vel að þeim verðlaunum kominn, ekki það að ég viti hvað klipping er frekar en næsti maður.

Reese Witherspoon og eiginmaður hennar, Ryan Phillipe, veittu verðlaun fyrir bestu förðun. Þegar kom að því að opna umslagið, sem innihélt nafn sigurvegarans sagði Phillipe við Witherspoon, sem lék nýverið í smellinum Legally Blonde: "Opna þú umslagið. Þú hefur meiri tekjur en ég", sem var ein af bestu línum kvöldsins. Witherspoon brosti en vissi að þetta var satt. Hún var skaffarinn á þeirra heimili.

Einhverjir Ný-Sjálendingar sem unnu við Lord of the Rings fengu verðlaun fyrir bestu förðun. Svo kom að bestu búningum. Ben Stiller og Owen Wilson veittu búningahönnuðum Moulin Rouge þau verðlaun og voru mjög fyndnir.

Svo kom að Woody Allen. Hann var fenginn á hátíðina til að kynna myndbrot um New York, en hann býr og starfar í New York. Allen hefur verið tilnefndur 20 sinnum til Óskarsverðlaunanna og unnið 3 sinnum, en aldrei mætt á hátíðina sjálfa fyrr en nú. Hann sagði nokkra góða brandara og sagði m.a. "Þegar fólkið frá Óskarsverðlaunaakademíunni hringdi í mig og vildi fá mig í þetta verkefni spurði ég af hverju þeir fengu ekki frekar einhvern af hinum stóru kvikmyndargerðarmönnum New York til að gera þetta; Martin Scorsese, Spike Lee, Sidney Lumet. Þeir sögðu að þeir hefðu þá þegar hringt í þá og enginn þeirra hefði verið laus."

Besta kvikmyndataka fór til Lord of the Rings, sem var mjög undarlegt, því best tekna mynd ársins var The Man Who Wasn´t There, en hún er svart-hvít og svoleiðis myndir fá ekki Óskarsverðlaun. Jodie Foster afhenti verðlaunin og viti menn; nýjasta myndin hennar verður frumsýnd næstu helgi. Ótrúleg tilviljun.

Inn á milli atriða kom Whoopi Goldberg og sagði brandara. Hún hélt sig á mottunni; sagði ekki jafn marga umdeilda brandara og 1999, þegar hún gekk fram af sumum. Sumt sem hún sagði var fyndið - annað ekki - en hún var létt og hélt fólki í góðu skapi sem er verkefni út af fyrir sig, því nú var hátíðin búinn að vera einn og háflur klukkutími og nóg eftir.

Verðlaun fyrir bestu heimildarmyndirnar voru veitt af Helen Hunt og Samuel L. Jackson. Andskoti leit Helen Hunt vel út. Tók ekki eftir hverjir hlutu verðlaunin en þetta voru þó einu raunverulegu kvikmyndargerðarmennirnir sem fengu verðlun þetta kvöldið.

Berglind okkar Ólafsdóttir kom með stytturnar inn á sviðið og leit vel út. Mér finnst við Íslendingar þurfum að koma betur fram við hana, þetta er jú það næsta sem við komumst þessum blessuðu verðlaununum.

Besta leikmynd fór til Moulin Rouge og er sú mynd vel að þeim verðlaunum komin.

Fjöllistamennirnir í Cirque De Soleil komu á svið og héldu smá sýningu. Cirque De Soleil eru einmitt mjög heitir í Bandaríkjunum núna.

Verðlaun fyrir bestu teiknimynd fór til Shrek, enda mjög skemmtileg mynd á ferð. Það sem er hins vegar merkilegt við þessi verðlaun er að hér eru þessi verðlaun veitt í fyrsta sinn og framlag teiknimyndarisans Disney, Monsters Inc., sigrar ekki heldur mynd frá helsta keppinaut Disney, DreamWorks.

Besta hljóð fór til Black Hawk Down.

Besta hljóðklipping fór til Pearl Harbor.

Besti aukaleikari var valinn Jim Broadbent, sem er hreint út sagt mjög góður leikari. Frá því ég sá hann í Bullets Over Broadway vissi ég að þessi strákur myndi gera það gott.

Whoopi Goldberg kom á sviðið og ræddi um Lord of the Rings. Hún kvartaði undan því að myndin væri 3 ½ klukkutími, fyrsti hluti þriggja mynda, en þrátt fyrir það væri enginn svartur hobbit í myndinni.

Bestu tæknibrellur fóru til Lord of the Rings. Svo kom að einum af þremur heiðursverðlaunum þetta kvöldið en "The Jean Hersholt Humanitarian Award" féllu í skaut leikstjórans Arthur Hiller. Þessi verðlaun eru veitt þeim kvikmyndargerðarmanni í Hollywood, sem hefur látið gott af sér leiða. Þetta er hálfgerður bastarður fyrir akademíuna enda ekki veitt nema þriðja hvert ár.

Verðlaun fyrir bestu tónlist fóru til Howard Shore fyrir Lord of the Rings. Hann er vel að verðlaununum kominn.

Þá var komið að öðrum heiðursverðlaunum eða Lífstíðar Óskar. Þau verðlaun fóru til Sidney Poitier. Allir stóðu upp og klöppuðu og brostu, líklegast án þess að vita hver þessi Poitier er.

Svo komu smástirnin Hugh Jackman (X-Men) og Naomi Watts (Mulholland Drive) og útdeildu verðlaunum fyrir bestu stuttmynd.

Ein af þeim verðlaunum sem Óskarsverðlaunaakademían átti aldrei að byrja á að veita eru verðlaunin fyrir besta lag. Fáir í akademíunni fylgjast með lögunum sem koma fram í kvikmyndunum sem þeir horfa á, þannig að þessi flokkur eru yfirleitt fullur af einhverju drasli. Yfirleitt eru sömu höfundarnir tilnefndir ár eftir ár, þannig að þessi flokkur er allt annað en marktækur.

Nokkrir listamenn komu á svið og fluttu sitt lag. Faith Hill flutti lag úr Pearl Harbor, sem minnti mig bara á hversu léleg sú mynd var. Um hvað var sú mynd eiginlega? Sendið póst á kvikmyndir.com.

Jennifer Lopez kom á svið og kynnti verðlaun fyrir besta lag. Tók ekki eftir hver vann en guð hvað Jennifer Lopez er falleg. Ég væri alveg til í að fá mér Honey Nut Cheerios með henni.

Akiva Goldsman fékk verðlaun fyrir handrit sitt að A Beautiful Mind (besta handrit byggt á áður birtu eða framleiddu efni) sem þýðir að akademían er búin að fyrirgefa Goldsman fyrir handrit hans að Batman & Robin.

Í sama flokki var handrit Peter Jackson að Lord of the Rings tilnefnt og að A Beautiful Mind skuli hafa unnið, gæti túlkast sem vísbending um hvernig stærri verðlaun kvöldins myndu fara.

Julian Fellowes hlaut verðlaun fyrir handrit sitt að Gosford Park (besta upprunalega handrit). Klukkan var orðin 4 um nótt. Spennandi.

Svo komu Sharon Stone og John Travolta og veittu verðlaun fyrir bestu erlendu mynd. Kvikmyndin No Man´s Land, sem þegar er byrjað að sýna hér á landi sigraði í þeim flokki, öllum að óvörum. Ég hélt að Amilie myndi vinna en það gerðist ekki. Þessi flokkur er raunverulega ekki spurning um gæði, heldur dreifingu. Meðlimir akademíunnar kjósa ekki myndir sem þeir hafa ekki séð. Það ætti því að nefna þennan flokk bara "besta dreifing".

Þriðji heiðursóskar kvöldsins var veittur Robert Redford og kom Barbra Streisand á svið til að veita þau. Ég vissi ekki að Barbra Streisand væri enn á lífi.

Svo kom að aðalverðlaununum. Russell Crowe gekk á svið og kynnti sigurvegarann sem var Halle Berry fyrir Monster's Ball. Þetta kom henni mjög á óvart og hún missti gjörsamlega stjórn á sér. Hún ofboðslega uppverðruð en þó glöð og svo grét hún og grét. Að lokum náði hún stjórn á sér, tók við verðlaununum, þurrkaði tárin, leit í myndavélina og sagði "ég vil þakka fjölskyldu minni, vinum, umboðsmanni, umboðsskrifstofunni og lögmanni mínum, sem sá um samningsgerð mína fyrir myndina." Vorum við búin að gleyma að þetta er atvinnuleikkona?

Að því loknu kom Julia Roberts á svið og tilkynnti hver myndi hljóta verðlaun sem besti leikari. Þau verðlaun komu í hlut Denzel Washington og var Roberts voða ánægð með að veita honum verðlaunin, enda eru þau miklir vinir. Þau meira að segja kysstust, en þá var klippt út í sal, enda mega blökkumenn og hvítir menn ekki kyssast í beinni sjónvarpsútsendingu í Bandaríkjunum.

Mel Gibson kom á svið og tilkynnti hver myndi hljóta verðlaun sem besti leikstjóri sem var Ron Howard fyrir myndina A Beautiful Mind. Hann er vel að verðlaununum komin, ekki það að mér hafi fundist A Beautiful Mind góð mynd (sem mér fannst ekki), heldur vegna þess að hann hefur með kvikmyndum sínum (The Grinch, Ransom, Appollo 13) malað milljónir í tekjur fyrir Hollywood á liðnum árum.

Svo loksins klukkan tuttugu mínútur í sex að íslenskum tíma (eða rétt fyrir háttatíma í Bandaríkjunum) voru úrslitin kynnt. Tom Hanks gekk á sviðið og tilkynnti verðlaunin fyrir bestu mynd. Verðlaunin féllu í skaut A Beautiful Mind, enda dæmigerð Óskarsverðlaunamynd á ferð.

Að lokum, eftir verðlaunahátíð sem stóð í 4 klst. og 17 mín., kom Whoopi Goldberg á svið, kvaddi alla og vottaði New York-borg samúð sína. Þetta var löng og frekar tíðindalítil hátíð, sem loks var búin. A Beatiful Mind fékk 4 verðlaun, Hobbitarnir 4 og Moulin Rouge 2.