Ég hef mjög gaman af samsærum, nema þegar þau beinast gegn mér. Það er ekkert skemmtilegra en að sjá Söndru Bulluck lenda í kreditkorta-vandræðum í The Net eða sjá Robert Redford hundeltan af glæpamönnum í Three Days of the Condor, en þegar samsærið hættir að vera kvikmynd og verður að raunveruleika, verður ástandið heldur ónotalegt. (Ástandið hefur reyndar verið ónotalegt frá því að R-listinn komst til valda en nóg um það).

Leyf mér að skýra mál mitt nánar. Samsærið sem ég tala um er verð á bíómiðum og það beinist ekki bara gegn mér, heldur öllum bíógestum á Íslandi. Þetta er það sem ég vil kalla bíómiðasamsærið. Það er verið að kúga fólk í þessu þjóðfélagi og þá er ég ekki bara að tala opinbera starfsmenn. Ég er að tala um allt þjóðfélagið.

Einu sinni kostaði 300 krónur í bíó. Nú kostar 800 krónur og hækkunin hefur borið brátt að. Í einu vetfangi kostaði 400 krónur, 500 krónur, 650 krónur og allt í einu kostaði 800 krónur í öll bíóhús í Reykjavík. Ég veit að það er talsvert síðan bíómiðar hækkuðu síðast en það þýðir bara að næsta hækkun er væntanleg. Mun bíómiði kosta 1000 kr. eftir viku eða jafnvel 1200 kr.? Ég veit það ekki. Ég er ekki skyggn. Mig grunar hinsvegar að á næstunni muni maður þurfa að skera bíóferðirnar niður og fara aðeins tvisvar á ári í bíó; á jólum og páskum. Og þá er tímabært að vitna í fleygustu orð Guðna Ágústssonar landbúnaðarráðherra: “Obb-bobb-bobb.”

Ég vil ekki byrja að röfla um þá dýrðardaga þegar ég var ungur – ég virðist gera það mikið – en nú kostar ekki bara meira í bíó; nú eru myndirnar meira að segja verri. Þegar ég var ungur voru bíóin uppfull af gæðamyndum. Meira að segja Laugarásbíó. Nú er ekkert sýnt nema þetta Pearl Harbor-drasl. Og Pearl Harbor var ekki bara léleg kvikmynd, hún er líka 200 mínutúr.

Ég veit ekki alveg hvernig maður á að bregðast við þegar maður lendir í samsæri. Kannski á maður að bregðast við eins og Sandra Bullock eða Robert Redford og reyna að komast til Chicago með lest fyrir miðnætti. En fyrir mig þá held ég að það sé ekki vænlegur kostur. Að minnsta kosti ekki þegar til lengri tíma er litið. Ég held mig við að kvarta á netið.