|
Sigurður
Guðmundsson
HVERJUM
DATT Í HUG AÐ BÚA TIL ÞESSA VITLEYSU?
Ég
biðst afsökunar á því að hafa ekki skrifað
pistil í langan tíma; ég hef nefnilega verið að
djamma geðveikt. En ég lofa að taka mig á í
pistlaskrifum. Mig langaði að setja saman lista yfir
þær myndir sem mér fannst bestar á árinu 2001 en
ég er svo seinn að það eru allir búnir að birta
listana sína. Ég ákvað því að safna saman á
lista þeim kvikmyndum sem mér fannst vera hvað
lélegastar á árinu 2001.
Hannibal
Án efa flottasta myndin á þessum lista;
falleg kvikmyndataka, glæsileg sviðsmynd, fínir
leikarar, fagmenn í hverju rúmi en það gleymdist
eitt - handritið. Þessi mynd fjallar ekki um neitt.
Meira segja persónurnar eru flatar og leiðinlegar.
Hér er Clarice Starling bara þurr og leiðinleg
piparjónka og Hannibal Lecter, sem var heillandi
glæpamaður í Silence of the Lambs, er hálfgerð
subba í þessari mynd. Ef þú vilt sjá Silence of
the Lambs aftur, þá skaltu bara sjá Silence of the
Lambs aftur.
Tomb
Raider
Hér er ein þumalputtaregla: ekki gera
kvikmynd eftir tölvuleik. Og í framhaldi af því,
ekki gera kvikmynd til að geta búið til tölvuleik
(Episode I - The Phantom Menace; hrikaleg mynd).
Söguþráðurinn er svo heimskulegur að ég stóð
sjálfan mig að því að hlæja á vitlausum
stöðum ... Hundrað milljón dollarar ofan í
klósettskálina.
The
Watcher
Keanu Reeves sem vondi kallinn? Ég
held ekki. Góðir leikarar eiga að leika vonda
kallinn - Keanu Reeves á að leika lögguna sem er
fráskilinn, drekkur og lifir fyrir starfið. Þetta
eru Kevin Costner-áhrifin; þó maður hafi einu
sinni leikið hermann (Dances With Wolves) og komist
áfallalaust frá því, þá má meður ekki
ofmetnast og halda sig geta leikið hvern sem er
(Costner sem hermaður í The Postman; Costner sem
ekkill í Message in a Bottle; Costner sem
lífvörður í The Body Guard; Costner sem ræningi
í 3000 Miles to Graceland etc.)
Joe
Dirt
David Spade er bara fyndinn þegar hann
hefur Chris Farley við hliðina á sér og Chris
Farley er dáinn og kemur aldrei aftur. Ergo - David
Spade ætti að snúa sér að einhverju öðru.
Dracula
2001
Olympíuverðlaunahafi lélegra mynda.
Svo slöpp að ég horfði ekki á nema helminginn af
henni. Ég veit ég fer til gagnýnenda-helvítis
fyrir að gagnrýna mynd sem ég sá ekki alla, en
það verður að hafa það.
Pearl
Harbor
Vitleysa ársins; 90 mínútur í
ástarþríhyrning sem gekk ekki upp og aðrar 90
mínútur í gegndarlausa slátrun á
Bandaríkjamönnum. Ég myndi frekar vilja sjá
þýska "scheise"-mynd en sjá þessa mynd
aftur.
Planet
of the Apes
Ég hef gert stuttmyndir sem innihalda
meira vit en þessi mynd (eins og Hasar og gellur
(1999) - fékk fína dóma).
Cherry
Falls
Þessi var andskoti léleg. Kannski var
ástæðan sú að ég hefði séð svo margar myndir
sem voru keimlíkar þessari eða það að fólkið
sem gerði myndina vissi einfaldlega ekki hvað það
var að gera. Svo vond að ég sendi bréf til
framleiðandans, Columbia-Tristar.
15
Minutes
Mynd sem ætlaði sér að gagnrýna
ódýrar kvikmyndir sem sýna tilgangslaust ofbeldi en
breyttist í nákvæmlega það sem henni var ætlað
að gagnrýna.
Harry
Potter and the Philosopher's Stone
Kvikmynd sem var gerð til að fá
fleiri börn til að lesa bækur!? Er ég eini
maðurinn sem tekur eftir kaldhæðninni? Ef við
viljum að börnin okkar lesi meira, hættum að gera
kvikmyndir. Þessi mynd var bara gerð til að græða
pening. Innantóm og sálarlaus.
Þar er
það komið, gott fólk. Minn listi yfir lélegustu
myndir ársins 2001 kominn á netið. Kannski finnst
sumum listinn koma full seint - menn byrjaðir að
plana árið 2002 og svoleiðis - en þetta er svottan
vinna að velja 10 lélegustu myndir ársins. Það
hefðu getað verið 100 myndir á þessum lista.
Bandaríkjamenn gera nefnilega mjög margar lélegar
myndir árlega. Í Hollywood eru menn í fullri vinnu
við að búa til lélegar kvikmyndir og hafa það
reyndar að ævistarfi að gera lélegar kvikmyndir
(s.s. Rodney Dangerfield; James Belushi; Sean Young;
Tom Berenger; allt leikaraliðið úr Friends; Whitney
Houston o.fl.). Það var því af nægu að taka.
Á
næstunni ætla ég að slappa aðeins af í
djammlífinu og reyna að skrifa fleiri pistla. Ég
lofa.
|
