Pistlar

SENDU OKKUR ÞÍNA SKOÐUN Á ÞESSUM PISTLI

Ragnar Trausti Ragnarsson
BOND ER BARA BOND

"Bond...James Bond." Og eftir það varð hann goðsögn. Ég get ekki annað en verið sammála Heiðari Ásberg. Þessi misheppnaða mynd Lee Tamahori, Die Another Day, er ekki sú mynd sem ég bjóst við. Undir lokin gekk hún, því miður, of langt. Þessar blessuðu tölvubrellur sem svo mikið eru notaðar í bíó virka bara ekki vel til lengdar í Bond mynd.

Það er ótrúlegt að Michael G. Wilson og Barbara Broccoli geti ekki gert betur. Fyrir hlé var myndin eins góð og hún gat verið. Bond sást alskeggjaður og fékk sér Bollinger og rakaði sig með Phillips. Ég átti ekki von á að sjá Halle Berry svona mikið í mynd. Hún stal oft senunni á köflum og maður áttaði sig stundum ekki á hvort maður var að horfa á Bond mynd eða Jinx mynd. Bond hefur oft áður fengið hjálp frá utanaðkomandi aðilum og Bond stelpurnar hafa oft verið hjálplegar. En nú runnu handritshöfundarnir heldur betur á bossann. Bond stelpan á oftast að vera hjálparvana. Hún á að geta bjargað sér út úr minniháttar vandamálum en guð minn góður þetta var bara of mikið í Die Another Day.

Ég verð að segja að Pierce Brosnan er í þriðja sæti yfir bestu Bondana mína. Sean Connery er fyrstur, Timothy Dalton er annar og Pierce Brosnan kemur í þriðja. Síðan koma Roger og George. Pierce Brosnan kemst nálægt Bond eins og hann er í bókunum. Hann er harðari og grófari. En samt nær hann að sýna húmorinn án nokkurra vandkvæða. Ég get ekki séð hver á að taka við af honum.

Tækin í myndini voru með þeim flottari. Aston Martininn var frábær og gaman að sjá felubúnaðinn. Sumir hafa sagt mér að þeim finnist þessi felubúnaður fara yfir strikið. Ég er ósammála. Lótusinn í The Spy Who Loved Me gat breyst í kafbát, af hverju getur ekki Aston Martininn horfið. Við erum nú einu sinni að þróa þessa tækni. Þegar leið á myndina var alltof mikið í gangi. Hún endaði illa og mér fannst plottið ekki skila því sem það átti að skila. Hvað í andskotanum var þessi sólarspegill? Áhorfendur vilja sjá James Bond í einföldum vandræðum ekki einhverju svona rugli. Mér fannst Moonraker trúverðugri en þetta. Ég held að handritið að næstu mynd að vera mjög frábrugðið þessu til þess að virka. Það var margt mjög gott við þessa mynd og margt sem leikstjórinn og aðrir gerðu mjög vel. Mér fannst til dæmis Bond lagið með Madonnu gott og það passaði vel við myndina. En samt sem áður á að vera hægt að gera betri Bond mynd. Ég vona bara að sparkað verði rækilega í Jinx.

Ég er ekki ánægður með þessa mynd og vil helst gráta mig í svefn á næturnar, en maður verður að taka sig á og þá mæli ég með einum vel kældum vodka. En málið er bara að það skiptir kannski ekki máli hvort Bond mynd er léleg eða góð, þetta er alltaf Bond ... James Bond.

Ég hvet ykkur til að senda mér lista yfir uppáhalds Bond myndirnar ykkar. Ég birti minn hér fyrir neðan:

1. Goldfinger, Aston Martin kynntur í fyrsta skipti, fræga laser atriðið.
2. Dr. No, Ursula Andress, þarf að segja meira.
3. You Only Live Twice, Ernst Stavro Blofeld og þyrlusenan.
4. Goldeneye, M orðinn kona og vel heppnað handrit.
5. Octopussy, besta myndin sem Roger Moore lék í.
6. Licence To Kill, frábær hasaratriði.

Höfundur er nemi í Kvennaskólanum.