Pistlar

SENDU OKKUR ÞÍNA SKOÐUN Á ÞESSUM PISTLI

Ragnar Trausti Ragnarsson
SENSE OG SIGNS

Einn af mínum uppáhalds leikstjórum er M. Night Shyamalan sem kom okkur svo skemmtilega á óvart með myndinni The Sixth Sense. Night eins og ég kýs að kalla hann vegna þess hve langt nafn hans er, skrifar og leikstýrir nánast öllum sínum myndum og hefur hann farið inn á mörg svið en svo virðist sem eitt svið sé honum efst í huga og það er það yfirnáttúrulega. Síðasta mynd hans Unbreakable var snilld og þeir sem hafa ekki séð hana skulu hlaupa núna út á videoleigu og leigja hana. Night hefur þá snilligáfu að geta plottað svo rosalega í handritum sínum að maður situr eftir í sætinu með gapandi munninn og með lafandi tungu. The Sixth Sense var fyrsta myndin sem ég sá frá þessum leikstjóra og eins og þeir vita sem sáu myndina var Night búinn að flétta svo rosalega saman söguna að þegar maður horfði á hana aftur þá gat maður varla púslað öllu saman.

Nú bráðlega kemur í kvikmyndahús enn ein myndin þar sem Night á heiður af handriti og leikstjórn. Signs heitir hún og skartar leikurum sem eru ekki af verri endanum, Mel Gibson og Joaquin Phoenix leika saman og verður útkoma þess örugglega athyglisverð. Myndin fjallar eins og fyrri myndir Nights um yfirnáttúrulega hluti, akurtákn sem hafa orðið til gegnum árin og sumir segja að séu skilaboð frá geimverum. Engin eðlileg skýring hefur fundist á þessum merkjum og eiga þau að myndast yfir nótt, í snjó eða á ökrum. Í Signs myndast svona merki á akri hjá manni sem leikinn er af Mel Gibson og brátt fara furðulegir atburðir að gerast.

Ég er farinn að hlakka til að sjá þessa mynd og ef hún verður eins og fyrri myndir hans þá held ég að maður verði ekki fyrir vonbrigðum. M. Night Shyamalan á engan sinn líkan í Hollywood og í kvikmyndaheiminum. Maðurinn er snillingur og það verður ekki tekið frá honum.

Ragnar Trausti Ragnarsson
er nemi í Kvennaskólanum og kvikmyndaáhugamaður