|
Ragnar Trausti Ragnarsson
TAKT'N
MEÐ ÞÉR
Ég hef lengi verið
að velta því fyrir mér hversvegna fólk þurfi
alltaf að fara með einhverjum í bíó. Það er
eins og það sé einhver regla sem segi það að
maður geti ekki farið einn í bíó. Taktu tvo með
þér, það er hámark. Ég hef farið einn í bíó
og ég er ekki einn um það.
Pör fara oft í
bíó. Oft er fyrsta stefnumótið bíóferð. Stelpan
kaupir sér aldrei neitt því hún er að passa
línurnar. Svo þorir maður ekki að kaupa sér
sjálfur nammi því þá heldur hún að maður sé
einhver offitusjúklingur. Best er að fara á
einhverja hryllingsmynd. Þá heldur hún í hendina
á manni og maður er við það að brotna. Resident
Evil er örugglega góð mynd fyrir elskendur,
þversögn ekki satt. Margir hafa vafalaust farið
með kærustunni sinni eða date´inu á einhverja
góða spennumynd. Endað síðan á Crossroads vegna
þess að stelpan í miðasölunni þekkti kærustuna
þína og benti henni á að fara á Crossroads með
Britney Spears því hún var svo æðisleg og sýndi
svo góða leikhæfileika. Þú situr svo inni í
bíóhúsinu og heldur í hendina á kærustunni, og
hennar hendi er við það að brotna. Spiluð einhver
tónlist sem maður heyrir í lyftu.
Þegar ég fer að
hugsa út í það þá er í rauninni engin ástæða
til að taka einhvern með sér í bíó. Maður talar
við hann í 5 mínútur fyrir utan bíóið. Maður
fer nú varla að halda uppi samræðum á miðri
mynd. Maður kannski segir eitthvað eins og
"þetta var magnað atriði" eða "vá".
Ég hefði ekki einusinni sagt, þetta var magnað,
við vin minn á Saving Private Ryan, því á þeirri
mynd var maður límdur við tjaldið. Síðan kemur
hlé og maður flýtir sér að komast fremstur í
nammisöluna og þegar hléið er búið og maður er
loksins búinn að fá miðstærð af poppi sem maður
var búinn að biðja um, þá segir maður við vin
sinn "góð mynd maður". Eina góða
ástæðan fyrir því að taka vin sinn með sér á
bíómynd er sú að maður getur talað um myndina
nokkrum dögum eftir að maður er búinn að sjá
hana.
Það er í rauninni
ekkert slæmt við það að fara með vini sínum í
bíó. En þegar maður fer með kærustunni þá sér
maður hvað maður á ekki sameiginlegt með henni.
Hún vill sjá Britney Spears, en þú vilt sjá John
Q. Ég segi bara kaupið miðann farið út að borða
og svo í bíó.
Ragnar
Trausti Ragnarsson
er nemi í
Kvennaskólanum og kvikmyndaáhugamaður
|
