Besta frumsamda handritið
Amelie, Gosford Park, Memento, Monster´s Ball, The Royal Tannenbaums.
Hafandi aðeins séð Amelie og Memento er nokkuð erfitt að meta hvað mér þætti sanngjarnt. Persónulega fyndist mér Amelie eiga skilið að hreppa hnossið en líklegast mydni ég þó telja að hin marglofaða Monster's Ball muni hafa vinninginn.

Besta handrit byggt á áður birtu efni
A Beautiful Mind, Ghost World, In the Bedroom, The Lord of the Rings: The Fellowship of the Ring, Shrek.
A Beautiful Mind hefur fengið mikið lof og þá sérstaklega leikur Russell Crowe. Ghost World er byggð á teiknimyndasögu og hefur einnig verið hælt af gagnrýnendum. Shrek er skemmtilegt ævintýri en fremur ólíklegt að hún vinni í þessum flokki. Líklegast má telja að Lord of the Rings vinni í þetta sinn sökum þess hve mikið þrekvirki hefur verið unnið með að koma þessari sögu á hvíta tjaldið.

Besta teiknimynd í fullri lengd
Jimmy Neutron: Boy Genius, Monsters Inc., Shrek.
Monsters Inc. og Shrek eru hvort tveggja mjög fínar myndir en því miður get ég ekki dæmt um Jimmy Neutron. Líklegast má telja að aðstandendur Shrek fari heim með verðlaunin.

Besta aukaleikkona
Jennifer Connelly (A Beautiful Mind), Helen Mirren (Gosford Park), Maggie Smith (Gosford Park), Marisa Tomei (In the Bedroom), Kate Winslet (Iris).
Jennifer Connelly stendur sig án efa ágætlega í hlutverki sínu en ég dreg í efa að hún fái verðlaunin í ár þar sem þetta er hennar fyrsta tilnefning. Marisa Tomei hefur unnið þau áður (1993 fyrir My Cousin Vinny) og Maggie Smith hefur verið tilnefnd fjórum sinnum sem aukaleikkona (vann árið 1979 fyrir myndina California Suite) og tvisvar sem aðalleikkona (vann árið 1970 fyrir The Prime of Miss Jean Brodie). Helen Mirren hefur verið tilnefnd einu sinni áður sem aukaleikkona (árið 1995 fyrir The Madness of King George en tapaði þá fyrir Dianne Wiest í Bullets Over Broadway) og Kate Winslet einu sinni áður verið tilnefnd sem besta aukaleikkona (fyrir Sense and Sensibility árið 1996 en það ár vann Mira Sorvina fyrir Mighty Aphrodite). Margir myndu e.t.v. segja að Connelly ætti besta sénsinn ásamt Tomei þar sem þær séu bandarískar en ég spái því að slagurinn verði milli Winslet og Mirren og Kate, í hlutverki skáldkonunnar Iris Murdoch, muni hafa betur.

Besti aukaleikari
Jim Broadbent (Iris), Ethan Hawke (Training Day), Ben Kingsley (Sexy Beast), Ian McKellen (The Lord of the Rings: The Felloship of the Ring), Jon Voight (Ali).
Jim Broadbent kemur víst mjög sterkur inn í hlutverki eiginmanns skáldkonunnar Iris Murdoch í kvikmyndinni Iris. Eins er Voight talinn sigurstrangleur í hlutverki íþróttafréttamannsins fræga Howard Cosell í myndinni Ali. Ian McKellen gæðir Gandalf lífi í Hringadróttinnssögu á listilegann hátt og Ben Kingsley er ógvekjandi í sínu hlutverki í Sexy Beast. Óvænt er að sjá Hawke á þessu lista tilnefndan fyrir tilþrifalítinn leik í meðal spennumynd. Þetta er fyrsta tilnefning Voight fyrir aukahlutverk en hann hefur verið tilnefndur fjórum sinnum sem aðalleikari og vann árið 1979 fyrir myndina Coming Home. Þetta er önnur tilnefning Kingsley sem aukaleikari en hann hefur einu sinni verið tilnefndur sem aðalleikari en þau verðlaun vann hann árið 1983 fyrir Gandhi. McKellen var tilnefndur sem aðalleikari árið 1999 fyrir myndina Gods and Monsters en laut þá í lægra haldi fyrir Roberto Benigni í La Vita è bella. Hawke og Broadbent eru hér að hljóta sínar fyrstu tilnefningar. Líklegt má telja að McKellen fái verðalunin en sjálfur spái ég því að snillingurinn Kingsley hljóti þau fyrir frábæran leik í Sexy Beast og væri það fullkomlega verðskuldað.

Besta aðalleikkona
Halle Berry (Monster´s Ball), Judi Dench (Iris), Nicole Kidman (Moulin Rouge), Sissy Spacek (In the Bedroom), Renée Zellweger (Bridget Jones´s Diary).
Zellweger stóð sig prýðilega í hlutverki Bridget Jones en verðskuldaði hún tilnefningu fyrir þann leik? Ég er ekki svo viss. Halle Berry er sögð standa sig vel í fangelsisdramanu Monster's Ball. Judi Dench fer víst á kostum í hlutverki skáldkonunnar Iris Murdoch á efri árum þegar hún glímdi við Alzheimer sjúkdóminn. Nicole Kidman var hvorki fugl né fiskur í fremur ofhlaðinni mynd. Sissy Spacek er sögð vinna mikinn leiksigur í In the Bedroom. Judi Dench hefur verið tilnefnd einu sinni áður sem besta leikkona í aðalhlutverki (árið 1998 fyrir Mrs. Brown en þá vann Helen Hunt óverðskuldað fyrir As Good as it Gets). Judi Dench hefur unnið til verðlaunanna fyrir aukaleik í myndinni Shakespeare in Love árið 1999. Þetta er sjötta tilnefning Sissy Spacek fyrir leik í aðalhlutverki en árið 1980 vann hún verðlaunin fyrir Cole Miner's Daughter. Kidman, Berry og Zellweger eru hér að hljóta sína fyrstu tilnefningar. Samkvæmt öllu eru það þær Dench og Spacek sem eru taldar eiga mest skilið að vinna en það er ekki alltaf spurt af því. Líklegast þykir mér að Kidman vinni þrátt fyrir tilþrifalítinn leik í tilgerðarlegri mynd.

Besti aðalleikarinn
Russel Crowe (A Beautiful Mind), Sean Penn (I Am Sam), Will Smith (Ali), Denzel Washington (Training Day), Tom Wilkinson (In the Bedroom).
Russel Crowe fer víst á kostum í hlutverki stærðfræðingsins John Nash. Sean Penn stendur sig vel í hlutverki hins þroskahefta Sam. Will Smith þykir hafa náð Muhammed Ali fullkomlega. Denzel Washington sýnir á sér nýja hlið sem spillt lögga. Breski leikarinn Tom Wilkinson (The Full Monty) leikur mann sem horfir upp á fyrrverandi eiginkonu sína eiga í ástasambandi við yngri mann. Wilkinson og Smith eru hér að fá sínar fyrstu tilnefningar. Penn hefur verið tilnefndur tvisvar áður en hefur ekki unnið. Þetta er þriðja tilnefning Denzel sem aðalleikari (aldrei unnið) en hann hefur tvisvar verið tilnefndur sem aukaleikari og vann verðlaunin árið 1990 fyrir Glory. Russell Crowe er hér að fá sína þriðju tilnefnigu í röð sem aðalleikari (vann í fyrra fyrir Gladiator en var tilnefndur fyrir The Insider árið 2000 en laut þá í lægra haldi fyrir Kevin Spacey í American Beauty). Líklegast er að Crowe hljóti verðlaunin annað árið í röð ef marka má það hól sem hann hefur fengið fyrir túlkun sína á Nash.

Besti leikstjóri
Ron Howard (A Beautiful Mind), Ridley Scott (Black Hawk Down), Robert Altman (Gosford Park), Peter Jackson (The Lord of the Rings: The Fellowship of the Ring), David Lynch (Mullholland Drive).
Ron Howard er hér tilnefndur fyrir að festa á filmu ævi stærðfræðingsins John Nash sem átti við geðræn vandamál að stríða. Ridley Scott stendur sig frábærlega í að segja sögu misheppnaðrar hernaðaraðgerðar í Sómalíu árið 1993. Robert Altman er tilnefndur fyrir morðgátumynd af gamla skólanum. David Lynch hefur tekist að gera heila mynd úr fyrstu þáttum sjónvarpsseríu sem varð aldrei neitt úr. Peter Jackson hefur tekist að koma á hvíta tjaldið merkasta ævintýri síðustu aldar, Hringadróttinssögu. Scott hefur tvisvar áður verið tilnefndur (fyrir Thelmu & Louise og Gladiator) en aldrei unnið. Hinn 77 ára gamli Altman hefur verið tilnefndur fjórum sinnum áður en aldrei unnið verðlaunin. Lynch hefur tvisvar áður verið tilnefndur (The Elephant Man, Blue Velvet) en ekki tekið styttuna heim með sér. Peter Jackson var tilnefndur fyrir handrit sitt að myndinni Heavenly Creatures árið 1995 en ekki verið tilnefndur fyrir leikstjórn áður. Howard er hér merkilegt nokk að hljóta sína fyrstu tilnefningu. Ég held að slagurinn verði á milli Altman (það fer hver að verða síðastur að verðlauna hann) og Howard. Jackson mun fá tækifæri til að sanna sig síðar og þá e.t.v. með næstu myndum í Lord of the Rings syrpunni. Ég held hins vegar að Howard muni fá verðlaunin því Altman hefur aldrei átt upp á pallborðið hjá akademínunni.

Besta myndin
A Beautiful Mind, Gosford Park, In the Bedroom, The Lord of the Rings: The Fellowship of the Ring, Moulin Rouge.
A Beautiful Mind hefur fengið misjafna dóma, Gosford Park almennt frábæra dóma líkt og Lord of the Rings og In the Bedroom. Moulin Rouge hefur fengið tiltölulega slaka dóma víða um heim. Ég held ég veðji á Hringadróttinssögu.