|
12.
JANÚAR 2002
A BEAUTIFUL MIND
Myndin byrjar í
vinalegu skólaumhverfi Princeton háskólans í
Bandaríkjunum. Þar kynnumst við Russel Crowe og
öðrum fræðingum framtíðarinnar. Crowe er mjög
sérlundaður og ekki mikil félagsvera. Crowe á
einnig í erfiðleikum með hitt kynið en
samskiptaörðugleikar Crowe í garð fallegrar
ljósku - og hvernig hann eða einhver vinur hans
gæti náð í hana - verður í staðinn kveikjan að
nýrri vídd í hagfræði þar sem glufur eru fundnar
í kenningar hins stórmerka Adams Smith. Þetta
reynist stórkostleg kenning sem fleytir Crowe áfram
í hörðum heimi fræðimennskunnar.
Nokkrum
árum síðar er Crowe kominn í góða stöðu sem
prófessor í stærðfræði auk þess sem hann er í
aukavinnu hjá bandaríska hernum. Smám saman fer
Crowe hins vegar að klikkast í hausnum og endar á
spítala. Kemur í ljós að það sem er að trufla
Crowe er að hann sér töluvert af fólki sem aðrir
sjá ekki. Reyndar var herbergisfélagi hans í
Princeton aldrei meira en hugarburður þótt þeir
hefðu alla tíð haldið góðu sambandi eftir að
skólanum lauk.
Crowe
þolir ekki lyfjagjöfina sem reynist nauðsynleg til
að bæla þessar kenndir niður. Í staðinn
ákveður hann að "ignora" þessa menn sem
ásækja hann stöðugt og reyna að lifa með þessum
veikleika sínum. Fer að lokum svo að hann nær
góðum tökum á þessum hæl. Það er náttúrulega
óþarfi að spilla öllu en myndin endar mjög vel.
Af
öðrum helstu leikendum er það að segja að Ed
Harris stendur sig með mikilli prýði sem
hugarburður Crowe í líki bandarísks
leyniþjónustumanns. Eddie, sem ég man ekki hvað
heitir í raunlífi en var kallaður "Eddie, the
crazy roommate" í Friends, stendur sig líka vel
sem og Judd Hirsch og Jennifer Connelly, sem leikur
eiginkonu Crowe. Aðrir eru svosem ekki það
merkilegir póstar að það taki því að telja þá
upp.
Í
heildina er Beautiful Mind mjög góð mynd. B.
Heiðar
Ásberg Atlason pistlahöfundur
er lögfræðingur sem stundar
framhaldsnám við University of Miami.
|
