Þegar á fletti upp þýðingu orðsins Tomcat á vefsíðunni Dictionary.com þá var mér skilað tveimur niðurstöðum. Orðið getur bæði þýtt karlkyns köttur og karlmaður sem á fleiri en einn bólfélaga. Þrátt fyrir að myndin sé dýrsleg á köflum og húmorinn fremur ógeðfelldur þá hallast ég þó frekar að því að seinni þýðingin sé hin rétta. Myndin hefst í brúðkaupi þar sem vinahópur sem samanstendur af nokkrum karlkyns aulum ákveður að sá sem giftist síðastur skuli hljóta stóran peningapott. Nokkrum árum síðar þegar einungis tveir vitleysingar eru enn ógiftir lendir annar þeirra (Jerry O'Connell) í því að þurfa að greiða stóra skuld. Til að bjarga málunum þá fær hann eiturharða löggu (Shannon Elizabeth) til að draga hinn ógifta hálfvitann (Jake Busey) á tálar og giftast honum. Að sjálfsögðu verður svo fyrrnefndi asninn ástfanginn af löggunni. Hér er um að ræða mynd í stíl við "American Pie" og "Road Trip". Tomcats gengur hins vegar jafnvel lengra en þær tvær í ódýrum húmor og þá sérstaklega hvað varðar kynlífsbrandara. Þó er hún mun verri en "American Pie". En þrátt fyrir að myndin sé öll bölvuð vitleysa og heimskulegur hamagangur frá upphafi til enda þá leiðist manni ekki og einstöku sinnum getur maður jafnvel hlegið að öllu ruglinu. Leikur og leikstjórn eru viðunandi. Engu að síður er hér um svokallaða "spólumynd" að ræða. - Hallur Örn Jónsson