Ed Crane (Billy Bob Thornton) er rakari. Eiginkona hans Doris (Frances McDormand) sér um bókhaldið í smásölu í hverfinu. Hún heldur framhjá eiginmanni sínum með verslunareigandanum (James Gandolfini). Ed sem veit af þessu er eðlilega ekki ánægður með þessa tilhögun. Svona hefst hrakafallasaga manns sem Coen bræður eru ábyrgir fyrir.

Myndin, eins og allar myndir þeirra bræðra, er næstum óaðfinnanleg í útliti og framleiðslu. Leikurinn er góður, myndatakan fín en myndin er höfð svarthvít til að skapa Film-Noir stemmningu og tekst það bara ágætlega. Vandamálið er hins vegar stórt og eitthvað sem við eigum ekki að venjast frá þeim bræðrum: Myndin er einfaldlega ekki nógu skemmtileg. Þó að hún sé reglulega hnyttin á köflum þá er hún fremur langdregin. Ekki hjálpar heldur að persónurnar eru svo fjarlægar að erftitt er að finna nokkuð til með þeim. Umbúðirnar hérna eru því virkilega glæsilegar en innihaldið fremur kalt og innantómt. - Hallur Örn Jónsson