Rosalega eru hundar alltaf sniðugir í bíómyndum. Hundar eru líka svo sætir. Þeir lifa flestar náttúruhamfarir af í kvikmyndum frá Hollywood á meðan mannfólkið fellur frá í umvörpum. Hundar eru oftar en ekki hetjurnar í myndum á borð við Spot. Mannfólkið er treggáfað eða brjóstumkennanlegt ef það er komið yfir 12 ára aldurinn og krakkarnir og hundarnir klárastir allra. Auðvitað er Spot miðuð að yngri áhorfendum líkt og myndir um hundana Lassie og Benji þegar ég var yngri. Þær myndir voru nokkuð skemmtilegar og hundarnir alltaf svo sniðugir og miklar hetjur. Krakkarnir í salnum skemmtu sér mjög vel á þessari mynd og höfðu mjög gaman af prump og detta bröndurunum og fullorðna fólkið í salnum hló af nokkrum tvíræðu bröndurunum sem virtust eðlilega fara fyrir ofan garð og neðan hjá börnunum. Sagan er afar einföld. Depill er hetja hjá FBI sem vinnur það sér til frægðar að gæða sér á öðru eista valdamikils mafíuforingja (Paul Sorvino sem upplifir hér án efa einn af lágpunktum ferils síns) og verður því að skotmarki leigumorðingja og þarf að fara í felur. Ungur auli (David Arquette öðru nafni herra Courteney Cox) lendir í því fyrir misskilning að passa son sætu gellunar í næstu íbúð (Leslie Bibb) ögn lengur en til var ætlast og þeir taka Depil að sér án þess að gera sér grein fyrir því hvar hann vinnur fyrir hundamatnum sínum. Myndin virðist hafa náð til markhóps síns þar sem unga fólkið virtist hafa mjög gaman af myndinni og án efa hefði ég hlegið meira ef ég væri 11 ára eða yngri. - Guðjón Helgason