Söguþráðurinn í mörgum myndum sem hægt væri að kalla konumyndir snýst um spurninguna: “Eru menn svín?” Í þessari mynd er bætt við svarinu: “Já, eða hvað?” Sagan segir frá Jane (Ashley Judd) sem vinnur sem framleiðandi sjónvarpsþáttar og fellur fyrir nýja starfsmanninum, Ray (Greg Kinnear), sem er þó í sambandi við aðra konu. Þau fella hugi saman en ekki er allt sem sýnist og málin stefna í óefni. Ennfremur er ýmsum kenningum um hæfni karlmanna til að standa í langtímasamböndum velt fram í myndinni. Inn í söguna fléttast kvennabósinn í vinnunni, Eddie (Hugh Jackman sem lék Wolverine í X-Men), sem hoppar rúm úr rúmi og vinkona Jane, Liz (óskarsverðlaunahafinn Marisa Tomei), sem Jane leitar til þegar á bjátar í ástamálunum. Sagan er ekki sérlega flókin og e.t.v. ögn fyrirsjáanleg en sett fram á mjög skemmtilegan hátt og leikararnir standa allir vel fyrir sínu en þó sérstaklega Judd og Jackman (sem mun væntanlega fara á kostum í hasarmyndinni Swordfish nú í sumar). Ég var einn fárra karlmanna í salnum þegar ég sá þessa mynd og það var ekki annað að heyra en að kvenkyns áhorfendum félli myndin vel í geð. Ég hef það eftir áreiðanlegum heimildum að þetta sé mjög góð stelpumynd og ég verð að vera sammála því, myndin er gamansöm og langt frá því að vera óþarflega væmin. - Guðjón Helgason