Einu sinni í fjarlægu landi bjó afskaplega lágvaxinn lávarður sem átti þann draum heitastan að verða kóngur. Til þess að uppfylla þá ósk þurfti hann einungis að finna réttu brúðina og kvænast henni. Auðvitað bregður hann á það ráð að tala við töfraspegilinn sinn sem gefur honum þrjá kosti. Fyrri tveir kostirnir eru þær Öskubuska og Þyrnirós en þriðji möguleikinn er Fiona sem er fangi dreka í kastala. Eftir strembna umhugsun verður Fiona fyrir valinu. Nú vantar Farquad lávarð bara hetju til að bjarga henni úr kastalanum þar sem hann er auðvitað engin slík hetja. Fyrir valinu verður stórt grænt, fremur ófrítt, en tilfinningnæmt tröll að nafni Skrekkur sem vill aftur móti ekkert frekar en að losna við allar þær goðsagnaverur sem hafa tekið sér bólstað í mýrinni hans. Málið er það að Farquad vill ekki slíkar verur í fyrirmyndarríkinu sínu og því hafa birnirnir þrír og fleiri kunnar verur tekið sér bólstað hjá Skrekki. Fær Skrekkur því samþykkt að hann fái löggilt afsal að mýrinni ef hann bjargar tilvonandi drottningu Farquads. Á leiðinni fylgir honum svo uppáþrengjandi og síkjaftandi asni, já asni, sem vill þó öllum vel. 

Þetta er í stuttu máli grunnurinn að söguþræði tölvugerðu teiknimyndarinnar "Shrek". Eins og glögglega sést þá er hér ekki um neina venjulega ævintýramynd að ræða. Hér hefur mörgum þekktum ævintýrum og ævintýraminnum verið snúið á haus og útkoman er hreint alveg frábær og á sinn hátt frumleg skemmtun fyrir alla aldurshópa. Með þessari mynd hefur Dreamworks endanlega tekist að skáka því tangarhaldi sem Disney hafði á þessari tegund mynda og er hún að því leyti tímamótamynd. En það sem gerir hana ekki síður að slíkri mynd er sjálft útlitið. Yfir 250 manns hafa unnið að gerð myndarinnar í hátt í tvö ár og útkoman er einfaldlega sjónræn veisla. Allt niður í minnstu smáatriði er alveg ótrúlega vel gert, svo vel að fyrirrennarar eins og t.d. Toy Story myndirnar líta út sem áhugamannaverk. Aftur á móti eru brellurnar aldrei í aðalatriði hér eins og í svo mörgum öðrum sumarmyndum. Þær virka einungis sem stoð í kringum skemmtilegan og jafnframt óvæntan söguþráð fullan af bæði frábærum húmor og boðskap sem þó verður aldrei nokkurn tímann þrúgandi. Talsetningin er ekki síður mögnuð en þar fara Mike Myers, sem hinn augljóslega hálfskoski Skrekkur, John Lithgow sem Farquad lávarður og Cameron Diaz sem Fiona prinsessa á kostum. Senunni stelur þó Eddie Murphy sem asninn, sem sannar enn og einu sinni hversu ótrúlega góður gamanleikari hann er. Í stuttu máli er "Shrek" skapstór nútíma ævintýramynd sem enginn ætti að láta fram hjá sér fara.  - Hallur Örn Jónsson