Frumraun leikstjórans Jonathan Glazer, Sexy Beast, er áhugaverð glæpa-, grín- og dramamynd sem er um leið mjög áhugaverð karakterstúdía og sálfræðispennumynd. Hinn frábæri Ray Winstone (Nil by Mouth, Love, Honour and Obey, The War Zone) leikur glæpamanninn Gal Dove sem er sestur í helgan stein á Spáni ásamt eiginkonu sinni og lifir þar ljúfu lífi og sólar sig milli þess sem hann snæðir góðan mat með vinum sínum. Þetta ljúfa líf hans er hins vegar truflað þegar geðsjúklingurinn Don Logan (Ben Kingsley) sækir hann heim og vill fá hann til að taka að sér verkefni í London. Gal vill ekki fara aftur út á glæpabrautina en hann veit að það er erfitt að segja nei við Don Logan. Sagan er mjög einföld en samskipti persónanna eru mjög skemmtileg og nettur dökkur húmor er alltaf undirliggjandi í frásögninni. Myndin er stílhrein og tekst leikstjóranum Glazer að krydda frásögnina með sniðugum sjónarhornum og áhugaverðum stíl sínum og er óhætt að segja að ég mun bíða spenntur eftir næstu mynd hans. Leikurinn er fyrsta flokks í þessari mynd og fyrir utan Winstone er gaman að sjá Ian McShane (Lovejoy) koma fram á sjónarsviðið á ný eftir nokkurt hlé. Það er þó að öðrum ólöstuðum sjálfur Ben Kingsley sem stelur senunni sem hin uppstökki og geðbilaði Don Logan. Það er einfaldlega unun að horfa á hann njóta sín í þessu hlutverki og það er nokkuð ljóst að hann er einn af betri leikurum í bransanum í dag og hefur það merka hæfileika að geta leikið á fullkomlega trúverðugan hátt allt frá Ghandi til geðsjúks glæpamanns og allt þar á milli. Þetta er því miður sjaldgæfur hæfileiki í kvikmyndabransa dagsins í dag sem byggir á sætabrauðsdrengjum sem gætu ekki leikið sig lausan úr blautum pappapoka. Það er vel þess virði að sjá þessa mynd þó ekki væri nema bara til að sjá hvernig leikarar ættu að bera sig að. - Guðjón Helgason