Nýjasta teiknimynd Disney og teiknimyndafyrirtækisins Pixar (Toy Story 1 og 2) fjallar um skrímslin sem koma út úr fataskápum barna á næturnar og hræða þau. Skrímslin búa í Monstropolis borg og þurfa á öskrum barna að halda til að nýta þau sem eldsneyti. Sulley (John Goodman) og Mike (Billy Crystal) vinna fyrir Skrímsli hf. sem gera sína menn út af örkinni til að hræða börn og sækja orku. Það sem börnin vita hins vegar ekki er að skrímsli telja börn banvæn og ein snerting gæti hæglega drepið hvaða skrímsli sem er. Síðan nær eitt barn í gegnum skápinn og þá er voðinn vís.

Hér er um að ræða stórskemmtilega teiknimynd fyrir unga sem aldna. Hér er eitthvað fyrir alla aldurshópa. Líkt og í Toy Story myndunum er hér um að ræða listilega teiknaða mynd og hrein unun að sjá hvað er hægt að gera með teiknimyndir. Framtíðin er björt fyrir þessa kvikmyndagrein og verður gaman að sjá hvað þeir hjá Pixar og fleiri slíkum fyrirtækjum láta frá sér í framtíðinni.

Monsters Inc. er í senn hugljúf, án þess að vera væmin, og fyndin, án þess að fara út í fullkominn delluhúmor. Frábærir leikarar ljá persónum myndarinnar raddir sínar. Auk Crystal og Goodman má heyra í þeim James Coburn, Steve Buscemi, Jennifer Tilly og leikstjóranum Frank Oz (sem hefur leikstýrt myndum á borð við The Score og Bowfinger auk þess að hafa ljáð Yoda í Star Wars og Prúðuleikurum á borð við Svínku og Fossa birni rödd sína). Framleiðendum og leikstjórum hefur því tekist fullkomlega ætlunarverk sitt sem hefur verið að búa til heillandi og skemmtilega teiknimynd fyrir alla aldurshópa.

Ég vil að lokum sérstaklega mæla með stuttmyndinni sem sýnd var á undan myndinni. Er þar um að ræða fuglamynd frá Pixar. Einföld er frábærlega fyndin mynd. - Guðjón Helgason