Í fyrstu mætti halda að það væri lítið mál að gera Söndru Bullock aðlaðandi en það er einmitt stóri brandarinn í þessari mynd. Sjáðu hvað Sandra er óaðlaðandi, fyndið! Sjáðu hvað erfitt er að gera hana aðlaðandi, fyndið! Sjáðu hvað hún er sæt og allir karlar slefa á eftir henni, sætt! Miss Congeniality er ögn fyndin mynd en söguþráðurinn er fyrirsjáanlegur og vægast sagt slakur. Einhver brjálæðingur ætlar að sprengja upp fegurðarsamkeppni Bandaríkjanna og Sandra er FBI kona sem fer í gervi keppanda til að athuga málið. Michael Caine kemur fram í þessari mynd og leikur mann sem hefur það að atvinnu að þjálfa keppendur. Hann fær það “erfiða” verkefni að þjálfa Söndru. Caine leikur Henry Higgins-legt hlutverk sitt eins vel og handritið leyfir, en honum virðist ekki líða vel í hlutverkinu. William Shatner, sjálfur Kirk kapteinn, stelur hins vegar senunni sem heimskur kynnir keppninnar. Semsagt ögn fyndin en lítið meira en það. - GH

SKOÐA SÝNISHORN ÚR MYNDINNI Á KVIKMYND.IS