Ein af óvæntustu ánægjunum sem kvikmyndahúsin hafa boðið upp á í vetur er heimildarmyndin um líf Lalla Johns. Lalli þessi er vægast sagt fremur skondin persóna. Hann hefur ekki átt auðvelt líf því síðustu árum hefur hann að mestu leyti eytt á Litla-Hrauni eða á vergangi í bænum. Hann tilheyrir þeim hluta samfélagsins sem flestir vita lítið um og aðrir reyna eftir megni að forðast. Hann tilheyrir þeim hluta sem leið mest fyrir það að Keisaranum við Hlemm var lokað. En þrátt fyrir allt mótlætið sem verður á hans vegi bugast hann ekki og það er hrein unun að fylgjast með þessum einstaka manni í sinni hversdagslegu baráttu fyrir mat og húsaskjóli. Þrír ungir kvikmyndagerðarmenn hafa fylgt honum eftir síðastliðin fjögur ár og eiga þeir mikið hrós skilið fyrir að gefa okkur skemmtilega og fróðlega innsýn inn í þennan dulda kima samfélagsins. Það er samt Lalli sjálfur sem gefur myndinni líf á sinn ógleymanlega hátt. - HÖJ