Eins og kemur fram í titli myndarinnar ætti ég alveg að geta komist yfir það hvað þetta er léleg mynd en það er varla. Enn einum kvikmyndaframleiðanda í Hollywood hefur dottið í hug að misþyrma stórskáldinu Shakespeare en myndin fjallar um uppfærslu á Draumi á Jónsmessunótt í einhverjum skóla í Bandaríkjunum. Svo skemmtilega vill til að sagan í verkinu endurspeglar atburði myndarinnar eins frumlegt og það nú er. Kirsten Dunst (Bring it On) er eins og illa gerður hlutur í þessari mynd en hún er alla jafna hin ágætasta leikkona. Martin Short tekst hins vegar vel upp í sínu hlutverki og hressir upp á myndina í hvert sinn sem hann kemur fram. Reynt er að troða frægum einstaklingum á borð við Carmen Electru (sem bregður fyrir í nokkrar sekúndur) og "söngvaranum" Sisqo inn í myndina til þess að hressa upp á hana en án árangurs. Athyglisvert er hins vegar að í myndinni bregður fyrir Colin Hanks, syni Tom Hanks, í fremur veigamiklu hlutverki og verður gaman að fylgjast með ferli hans á næstunni þó hans verði líklega ekki minnst fyrir þessa mynd. - Guðjón Helgason