Góða nótt Meg Ryan, og sofðu rótt. Takið allar rómantísku gamanmyndirnar sem þið eigið með Meg Ryan og hendið þeim í ruslið. Renée Zellweger gerir þetta miklu betur. Auðvitað er hún svolítið pírð og skrýtin til augnanna, og einhverjir láta það fara í taugarnar á sér. En hún leikur hana Birgittu alveg glimrandi vel. Og myndin er einhvern veginn svo miklu eðlilegri heldur en flestar aðrar rómantískar myndir. Ein vinsælasta myndin af þeirri gerðinni er auðvitað Pretty Woman. Og hana hef ég horft á þúsund sinnum. En lets face it, Júlía Roberts var nú ekkert sérstaklega sannfærandi mella! Hún var allt of skynsöm, klók og hæfileikarík til þess að þurfa að vinna fyrir sér með þeim hætti. Og þetta á við um svo margar rómantískar gamanmyndir, þær ganga einhvern veginn ekki alveg upp, þær lýsa atburðarás sem myndi aldrei eiga sér stað í hversdagslegum raunveruleikanum. Þessu er öfugt farið í myndinni um dagbókina. Þar er allt svo eðlilegt og trúverðugt. Ég held að ansi margar konur geti séð sig í henni Birgittu. Myndin er svo fyndin, eðlileg og sæt að þið verðið bara að sjá hana. Og svo er hann Hugh Grant meira að segja bara helvíti góður í hlutverki sínu. Síðast en ekki síst þá hafa strákar líka gaman af þessari mynd… alveg satt. Ég sat í troðfullum sal eitt í Háskólabíói og strákarnir tuttugu sem voru á myndinni hlóu og grétu til skiptis. - Sigþrúður Ármann