Að horfa á Blow er eins og að klífa fjall. Myndin toppar í hléi en eftir það er hún á stöðugri niðurleið. Sagan er víst sönn og fjallar um ris og fall eins umsvifamesta eiturlyfjasmyglara í sögu Bandaríkjanna, George Jung, sem leikinn er af Johnny Depp. Hann á að hafa unnið það heldur vafasama afrek að hafa innleitt kókaínið, eiturlyf ríka og fræga fólksins, til Bandaríkjanna. Sagan fylgir honum alveg frá grasrótunum á strönd í Kaliforníu á sjöunda áratugnum til dagsins í dag. Heimur eiturlyfjanna er víst harður og stutt er á milli þessa að svíkja og vera svikinn. Kemur þetta sérstaklega niður á sambandi hans við dóttur sína, eiginkonu (Penélope Cruz) og foreldra sem er meginþemað eftir hlé. Gallinn er bara sá að sú saga er ekki nærri því eins grípandi og skemmtileg og sagan um ris hans til "frama" sem lýst er í fyrri hlutanum. Þetta er ekki heimildamynd um eiturlyfjabransann þó að hún veiti okkur við og við innsýn inn í hann. Hún sýnir ekki áhrifin sem kókaínið sem George Jung seldi hafði á milljónir Bandaríkjamanna. Myndin er um George sjálfan og hún stendur og fellur með því hvort áhorfandinn getur fundið til samúðar með slíkum manni. Undir þessum kringumstæðum er gríðarlega mikilvægt að aðalleikarinn skili góðu verki og eins og ávallt þá stendur Johnny Depp undir væntingum. Ég er mikill aðdáandi hans og hann á allan heiðurinn af seinustu hálfu stjörnunni sem myndin fær. - Hallur Örn Jónsson