3. október árið 1993 sendi bandaríski herinn menn sína inn Mogadishu, höfuðborg Sómalíu, til að ná í tvo háttsetta aðstoðarmenn stríðsherrans Aidid. Atburðarásin komst síðan í heimsfréttirnar þar sem margt fór öðruvísi en áætlað var. Myndin Black Hawk Down byggir á bók eftir blaðamanninn Mark Bowden sem segir þessa sögu á áhrifaríkann hátt og fylgir myndin bókinni vel eftir.

Í aðalhlutverkum eru margir þekktir og góðir leikarar á borð við Ewan McGregor, Josh Hartnett, Tom Sizemore og Sam Shepard ásamt framtíðarstjörnum á borð við Eric Bana. Leikstjóri er gamli góði Ridley Scott (Alien, Blade Runner) sem sýnir enn og aftur hversu góður hann er í að byggja upp spennu og halda athygli áhorfandans. Honum tekst að búa til mynd sem sveipar atburðina ekki í einhverjum Hollywood bjarma eins og oft vill verða með myndir sem taka á raunverulegum atburðum. Atburðarásin er ekki krydduð um of með væmnum hliðarsögum um persónulega hagi hermannanna og eiginkvenna þeirra sem bíða heima eftir því að þeir snúi aftur. Auðvitað er ekki hægt að komast fullkomlega hjá slíku í mynd sem þessari en Scott hefur þó haldið því algjörlega í lágmarki. Heimspekilegar vangaveltur um stríð og tilgang þess eru algengar í myndum um böl stríðsátaka. Þeim vangaveltum er þó einnig haldi í lágmarki í þessari mynd. Hér er hins vegar sagt frá augljósum klaufaskap hersins í að stjórna aðgerðinni. Einnig er augljós sú ofuráherslu sem lögð er á þá óraunhæfu kröfu að dauði þó ekki nema eins bandarísks hermanns í stríði sé óásættanlegur vegna almenningsálitsins. Þess vegna verði að ná í hvern og einn sem eftir verður hvað sem það kostar.

Black Hawk Down er tæknilega mjög vel unnin og er yfirbragð hennar mjög vandað og svipar myndinni nokkuð til Saving Private Ryan hvað útlit varðar. Leikararnir standa sig allir prýðilega og þá vil ég sérstaklega hæla þeim McGregor og ástralska nýliðanum Eric Bana. Framleiðandanum Jerry Bruckheimer hefur hér tekist það sem mistókst svo hrapalega með Pearl Harbor. Hann hefur gert mynd um þennan hræðilega atburð án þess að reyna að blanda inn í hana ástarsögu og selja myndina síðan á fölskum forsendum. Hér er einfaldlega um að ræða þrælfína hasarmynd sem fjallar um hræðilega atburði sem áttu sér stað nánst í beinni útsendingu árið 1993. - Guðjón Helgason