Bókasería rithöfundarins James Patterson um lögreglumanninn Alex Cross hefur náð nokkrum vinsældum í Bandaríkjunum og hafa bækur um hann nú komið út um nokkurra ára skeið. Fyrsta bókin um Alex Cross hét Along Came a Spider og byggir þessi mynd á þeirri bók. Hér er um að ræða sjálfstætt framhald myndarinnar Kiss the Girls frá árinu 1997 sem byggði einnig á bók eftir Patterson en þar fór Morgan Freeman einnig með hlutverk Alex Cross. Í þessari mynd á Cross í höggi við hættulegan glæpamann sem rænir dóttur þingmanns og virðist hafa ýmislegt skuggalegt á prjónunum í framhaldi af því. Ég vil ekki láta meira uppi um söguþráð myndarinnar og lofa aðeins ágætri spennumynd. Myndin nær í raun takmarki sínu, að skemmta áhorfandanum og byggja upp spennu. Leikstjóranum Lee Tamahori (Once Were Warriors, Mullholland Falls, The Edge) tekst ágætlega upp í þessari mynd og leikararnir standa sig allir með ágætum. Þetta er ef til vill ekki sérlega eftirminnileg mynd og keimlík mörgum spennumyndum sem komið hafa fram á síðustu árum. Þetta er þó hin ágætasta skemmtun og sæmileg afþreying en lítið meira en það. Ég hugsa að ég næli mér nú í eina Alex Cross bók því ég hef alltaf haft gaman af góðum reyfurum. - Guðjón Helgason