Tony Stark er helsti hönnuður og framleiðandi vopna í heiminum.  Vopnin hans eru þau þróuðustu í heiminum og þeir sem þau kaupa hafa hernaðarlega yfirburði yfir aðra.  Það þarf því ekki að koma á óvart þegar honum er rænt af afgönskum hryðjuverkamönnum sem krefjast þess að hann smíði vopn fyrir sig.  Meðan hann er í haldi þeirra hannar hann vélbúning til þess að sleppa úr þeirra haldi.  Þar með má segja að Iron Man verði til.

Það er Robert Downey Jr. sem fer með aðalhlutverkið í myndinni en auk hans fara Jeff Bridges, Gwyneth Paltrow og Terrence Howard með hlutverk í myndinni.  Robert Downey er virkilega góður í sínu hlutverki, sérstaklega sem gerir hann Tony Stark að skemmtilegri persónu.  Jeff Bridges er einnig mjög skemmtilegur í myndinni, frábrugðin sjálfum sér með þennan skalla sem fer honum bara nokkuð vel.

Jon Favreau leikstýrir myndinni og virðist skilja hvernig á að gera góða mynd.  Fæstar ofurhetjumyndir síðustu ára hafa verið góðar og í flestum tilfellum virðast sömu mistökin vera gerð í þeim öllum, þ.e. ekki nógu mikil áhersla er lögð á persónusköpun og raunveruleika.  Iron Man er hins vegar vel skrifuð og vel útpæld og fær Favreau prik fyrir það.

Iron Man er einhver besta ofurhetjumynd sem sést hefur, hún kemst ekki í flokk með Batman og Batman Begins en er engu að síður langtum betri en aðrar Marvel myndir. 

Davíð Örn Jónsson