Hver er uppáhaldsmynd
Margeirs Péturssonar?

Uppáhaldskvikmynd mín er Blade Runner frá árinu 1983 gerð af leikstjóranum Ridley Scott. Þetta var tímamótamynd, leiktjöldin að miklu leyti gerð í tölvu og í henni birtist skuggaleg framtíðarsýn á það hvert tækniframfarir muni leiða mannkynið. Ég las vísindaskáldsögur af kappi sem unglingur og heillaðist því strax af myndinni. Að mínu mati ber hún af flestum öðrum framtíðarmyndum, ekki síst fyrir nákvæmni, hugvitssaman söguþráð og frábæra persónusköpun. Ef einhver hefur efast um að Harrison Ford gæti leikið, þá efuðust fáir um það eftir að hafa séð hann í hlutverki vélmennabanans Deckards. Tvö helstu vélmennin í myndinni eru snilldarlega leikin af þeim Rutger Hauer og Sean Young. Það vakna fjölmargar spurningar í huga áhorfandans þegar vísindamönnum tekst að skapa vélmenni af þvílíkri snilld að það gerir sér ekki grein fyrir að það sé óekta. Rutger Hauer er ógleymanlegur í hlutverki vígavélmennisins Batty sem gengur til bardaga með spakmæli á vör. Hann var nefnilega forritaður þannig að hann getur vitnað í heimsbókmenntirnar við hvert tækifæri. Söguþráðurinn gengur út á að flokkur vélmenna hefur sloppið til jarðar, þau vita að líftími þeirra er að renna út og áætlun þeirra er að finna vísindamanninn, skapara sinn, til að fá framlengingu á lífi sínu. Harrison Ford er settur í að stöðva þau og úr verður æsispennandi kapphlaup. Með snilld sinni í skák (það dregur auðvitað ekki úr áhuga mínum á myndinni) nær Rutger Hauer settu marki, en myndinni lýkur ekki við það! Ég sá myndina fyrst nokkrum sinnum í bíó, en það eru ein 13 ár síðan ég keypti Blade Runner á spólu og hef séð hana að minnsta kosti 10 sinnum síðan. Hún var endurgerð fyrir nokkrum árum til að tæknibrellurnar gætu notið sín betur með betri myndgæðum. Hvorki vinir mínir né konan mín skildu þetta uppáhald mitt á myndinni á sínum tíma og hentu jafnvel gaman að. En óaðfinnanlegur smekkur minn sannaðist enn einu sinni í fyrra þegar myndin var kjörin ein þeirra tíu bestu á öldinni af einhverjum sérfræðingum. Miðað við framtíðarmyndir sem nú eru í boði sýnist mér Blade Runner hafa fyllilega staðist tímans tönn og jafnvel gott betur.

Margeir Pétursson,
stórmeistari í skák og
stjórnarformaður MP Verðbréfa hf.