Hver er uppáhaldsmynd
Kolbrúnar Halldórsdóttur?

Þegar ég sest niður og leiði hugann að kvikmyndunum í lífi mínu þá er erfitt að slíta sig aftur frá öllum þeim góðu myndum sem í hugann koma. Þar kennir margra grasa, mér virðist jafnvel að hægt sé að skipta lífi mínu niður í ákveðin tímabil eftir myndunum sem ég hef haft mest dálæti á. Það var söngleikja-tímabilið þegar varla leið heil helgi án þess að horft væri á Rocky Horror. Önnur slík sem fylgt hefur mér gegnum lífið er Jesus Christ Superstar. Fiðlarinn á þakinu stendur líka alltaf fyrir sínu, Singing in the Rain, Galdrakarlinn í Oz og jafnvel Oklahoma! Svo er það skandinavíska deildin, þar hafa staðið upp úr myndir á borð við Mit liv som hund, Fucking Åmål og Tilsammans. Kannski telst Myrkradansarinn líka til skandinavisku deildarinnar. Svo hef ég haft dálæti á ákveðnum leikstjórum, þar ber trúlega hæst Tim Burton. Af myndunum hans verð ég að nefna Pee-Wee's Big Adventure, Beetlejuice, Edward Scissorhands..... og þegar ég hugsa um Johnny Depp í hlutverki Edda Klippikrumlu þá kemur Cry-Baby auðvitað upp í hugann, -sú frábæra mynd John Waters, ég horfði á hana upp til agna. Svo hafði ég gaman af Mike Leigh á tímabili og löngu fyrr var Franco Zeffirelli uppáhaldið, sú flottasta sem hann gerði var eflaust Brother sun - Sister moon eða óperumyndin hans La Traviata, Shakespeare myndirnar hans voru líka flottar og Jesú-myndin. Af dramatiskum myndum minnist ég The Crying Game og af því að ég sá aftur fyrir skemmstu frábæra mynd með Johnny Depp (sem hefur löngum verið í uppáhaldi) What's Eating Gilbert Grape. Svo má ég ekki gleyma Talking Heads tímabilinu, mér fannst True Stories flott. Ég er líka svolítill teiknimynda-fíkill, var t.d. að horfa á frábæra franska teiknimynd um daginn Kirikou og ein úr þeirri átt er Nightmare Before Christmas. Eftir þessar vangaveltur held ég að það sé nokkuð ljóst að ég á enga eiginlega uppáhaldsmynd, bara ótal dálætismyndir.

Kolbrún Halldórsdóttir,
alþingismaður