Hver er uppáhaldsmynd
Jóns Ólafssonar?

Mary Poppins er sennilega sú kvikmynd sem er í mestu uppáhaldi hjá mér. Auðvitað eru þær margar aðrar sem eru eftirminnilegar en þessi skipar einhvern sérstakan sess hjá mér.  Ég var auðvitað barnungur er ég sá hana fyrst. Hún heltók mig um leið.  Eftir að ég fór að búa til börn fannst mér upplagt að horfa á kvikmyndina með þeim. Þau urðu dolfallinn samstundis, alveg eins og pabbi gamli!  Hvað er það við myndina sem gerir hana svo eftirminnilega?  Margt. Tónlistin yndisleg.  Þarna er að finna kómísk lög í bland við tregablandna söngva. Öll lifa þau góðu lífi enn þann dag í dag.  Julie Andrews og Dick Van Dyke eru óviðjafnanleg í aðalhlutverkunum.  Julie er mín manneskja. Ekki spurning. Frábær söngkona.  Gullfalleg í ofanálag og alltaf svo góð og blíð. Alveg til fyrirmyndar.  Fjöllistamaðurinn Dick Van Dyke dansar auðvitað eins og sérfræðingur þegar svo ber undir í myndinni og lágstéttarframburðurinn alveg frábær í talmáli kappans.  Eitt atriði stendur upp úr að mínu mati í kvikmyndinni. Það er þegar þau skötuhjú labba inn í teiknimynd og dansa í takt við mörgæsir, hænsn, kindur og beljur í dágóða stund.  Mér finnst þetta atriði svo stórkostlegt, sérstaklega miðað við að það eru í kringum 30 ár síðan myndin var gerð.  Roger Rabbit myndin og Michael Jordan myndin með Kalla kanínu fölna hreinlega við samanburðinn.  Annað var það ekki.  Amen.

Jón Ólafsson
tónlistarmaður