Hver er uppáhaldsmynd
Jóns Kristjánssonar?

Það vill svo til að ein af þeim myndum sem ég hef orðið mest snortinn af þegar ég sá hana í kvikmyndahúsi var sýnd í sjónvarpinu á páskadag. Það er myndin Póstmaðurinn eða Il Postino á frummálinu. Þetta er einkar falleg mynd, sem hefur hins vegar pólitískan undirtón þar sem söguhetjan verður fyrir barðinu á ofbeldi. Kynni skáldsins Pablo Neruda og bréfberans, hvernig þau leiða til þess að hinn næmi ómenntaði sjómaður fer að fást við skáldskap er ein eftirminnilegasta atburðarás sem ég hef séð á hvíta tjaldinu og þau samanstanda af frábærlega vel unnum og fallegum senum. Þessi mynd er til þess fallin að opna dyrnar að töfrum skáldskaparins og myndhverfinganna sem má sjá svo víða í ljóðum m.a. skálda hérlendis. Mér finnst þessi mynd einn lofsöngur til fegurðarinnar og skáldskaparins, vináttunnar og ástarinnar. Hún er sannkallað meistaraverk að mínu mati.

Ekki er hægt að minnast á þessa mynd án þess að geta um hinn frábæra leik Massimo Troisi. Hins vegar varð þetta svanasöngur hans, því fljótlega eftir að ég hafði séð myndina þegar hún var sýnd í kvikmyndahúsum hér las ég um það frétt að hann væri látinn.

Það er heldur ekki hægt að skilja við umfjöllun um þessa mynd án þess að minnast á umgjörðina sem ítalska þorpið og landslagið veitir sögunni, hið óbrotna líf fiskimannanna og náttúruskynjun bréfberans og kráin sem er miðpunktur samfélagsins.

Það er erfitt að gera upp á milli kvikmynda og ég vil nefna aðra frábæra mynd sem sýnd var hér í vetur sem var Buena Vista Social Club. Þessi mynd samanstóð af stórkostlegum tónleikum frá upphafi til enda, litríkum og eftirminnilegum karakterum og myndum frá Havana sem sögðu meira en mörg orð um þessa borg sem einu sinni var leikvöllur ríkra Bandaríkjamanna, en skortir nú málningu og viðhald á hinar glæsilegu villur. Hins vegar skortir ekki taktinn og sönginn, hann lifir í fólkinu, og ég segi það satt að mig langar til Kúbu til þess að upplifa þennan takt. Hvenær eða hvort sú ósk rætist er ekki gott að segja um.

Jón Kristjánsson,
heilbrigðis- og tryggingamálaráðherra.