Hver er uppáhaldsmynd
Guðmundar Árna Stefánssonar?

Besta bíómyndin! Það eru þær kvikmyndir sem setja mark sitt til lengri eða skemmri tíma á tilfinningar,viðhorf og atferli þeirra sem á horfa. Og það er vissulega mjög misjafnt eftir kvikmyndum hvort þær yfirleitt skilji nokkuð eftir í vitund áhorfandans. Og stundum er það bara allt í lagi - stundaráreiti, skemmtunargildi í núinu. Ekkert meir. 
Með öðrum orðum: Þær eru margar kvikmyndirnar sem mér hafa fundist góðar og haft áhrif. Og smekkurinn breytist. Roy Rogers myndirnar frá því í gamla daga hafa vikið fyrir nýjum stjörnum. Og því leyni ég ekki að það er ekki aðeins kvikmyndin sjálf sem grípur mann, heldur ekki síður þeir leikarar sem bera viðkomandi kvikmyndir uppi. Þannig er minn maður á hvíta tjaldinu Jack Nicholson. Gaukshreiðrið var ógleymanleg kvikmynd þar sem minn maður fór á kostum. En í gjörólíkum kvikmyndum eins og Terms of Endearment var hann einnig fantagóður og kvikmyndin þá um leið. Nicholson klikkar hreinlega ekki. 
Góðar myndir? Listinn er langur. En þó miklu styttri en þegar nefna skal til sögunnar vondar kvikmyndir. Af betri listanum koma upp í hugann myndir eins og Don´t look now, Braking the waves og sú síðasta sem ég sá í bíó - Traffic. Hún var listavel gerð og efnistökin nýstárleg. 
Og ekki má gleyma íslensku kvikmyndunum. Ég reyni að sjá þær allar. Og sumar þær bestu standast prýðilega samjöfnuð við það besta úti í hinum stóra heimi.

Guðmundur Árni Stefánsson
alþingismaður