15 MINUTES

Hasarmynd með Robert De Niro í aðalhlutverki. Þetta veit svo sannarlega á gott enda De Niro ekki vanur að leika í rusli. Fifteen Minutes er spennumynd og það sem meira er sæmilega gáfuleg spennumynd. Leikstjórinn og handritshöfundurinn John Herzfeld (2 Days in the Valley) leggur upp með ákveðna sögu með boðskap og ferst það ágætlega úr hendi. Myndin fjallar um frægð í Bandaríkjunum, hvernig hægt er að gera hræðilega hluti og verða frægur og vinsæll á svipstundu. Myndin kemur á óvart á köflum og fer ekki alfarið troðna slóð annarra hasarmynd af sama meiði. Boðskapur myndarinnar fer að einhverju leyti fyrir ofan garð og neðan þegar á líður og höfundurinn virðist hafa haft ákveðna háðsádeilu í huga þegar hann skrifaði handritið. Kelsey Grammer (Frasier) kemur skemmtilega á óvart sem ósvífinn sjónvarpsþáttastjórnandi en Edward Burns (The Brothers McMullen, Saving Private Ryan) er samur við sig og leikur nánast alltaf eins. Það eru hins vegar Karel Roden og Oleg Taktarov sem stela senunni sem þorparar frá Austur-Evrópu. - GH